மகளே இறந்துவிடு

பிறந்த குழந்தை
கை அளவே இருந்தது .
குறைப் பிரசவம்.
பிழைக்குமா தெரியாது
பிழைத்தாலும்
பெரிய செலவாகுமாம்..
கிழிந்த துணி போல்
கூட்டுக்குள்
அசைவின்றி கிடந்தது.

எட்டிப் பார்த்த அவர்
சின்னக் கை அழுத்தல் கூட
இல்லாமல் போனார் .
எவ்வளவு செலவாகும்
என்று
வேண்டுமென்றே சத்தமாக
வராண்டாவில் பேசுகிறார்கள்.

கண்ணீர் பெருகி
படுக்கையை நனைத்தது
பால் பெருகி
நெஞ்சு வலித்தது.

மிருகங்களாய்க் கலந்து
பூஞ்சையாய்
ஒரு ஜீவனைப் பூத்து
அதன் முகம் கூடப்
பார்க்காது
ஓடுகிறார் அவர் .

மாமியார்
ஒரு
அழுகிய பொருளைப்
பார்க்கும் பாவனையுடன் சொன்னாள்
''எங்க பரம்பரையில்
யாருக்கும் இப்படி கிடையாது''

மேலே மின்விசிறி
என் வாழ்க்கை போல்
சுற்றுகிறது .
சுவர்களில் நீளும்
பல்லியின் நிழல்களை வெறிக்கிறேன்.

யாரும்
நம்பிக்கையாய்ப் பேசவில்லை.
பிழைத்தாலும்
மூளை வளர்ச்சி இருக்குமா
என்று சந்தேகம் அடைகிறார்கள்

கை ஊன்றி எழுந்து
கூண்டுக்குள் தூங்கும்
என் தலைச்சன் பிள்ளையைப்
பார்த்து
கண்ணீர் வழிய சொல்கிறேன்
''மகளே இறந்து விடு''