Wednesday, September 29, 2010

உடல் ஊற்று

எனக்கு அது
மலநாற்றப் புனல்குழி
உனக்கு அது
வாச மலர்ப் பாண்டம்
அமிர்தம் கசியும் ஊற்று

எனக்கு அது
நஞ்சு ஊறும் நிலம் 
வெறும் நிணம்
மூடும் திரை
உனக்கு அது
உயிர் ஓவியத்தின் உடை

உடல் என்பது
உன்னை 
காற்றில் ஏற்றும் சிறகு
எனக்கு அது
கயத்தில் ஆழ்த்தும் கல்

உடல் திரவங்களின்
வெறியாட்டம் மட்டுமே
அது எனக்கு
உனக்கு அது
உணர்வுகளின் நடனம்

நான் என்றும்
மரங்களைப் பார்ப்பதே இல்லை
மரமென்றால் எனக்கு காடே
காடு மேவிய வானே
வான் தாண்டிய வெளியே
வெளி அடங்கும் சுழியே ..

உனக்கு
காடென்றால்
மரங்களின் கூட்டமல்ல
அது
உன் பெயர்  மட்டும் அறிந்த
ஒற்றை மரம்
அது வளர்க்கும் பூ
அது மறைக்கும் சூல்
அதில்
 உனக்கே உனக்காய்த் துடிக்கும்
ஓர் உயிர்

இவ்விதம் நாமிருக்க
செம்புலப் பெயல் நீர் போல்
இருவரும்
கலப்பது எவ்விதம்..

LinkWithin

Related Posts with Thumbnails