Thursday, February 24, 2011

இடறல்

விவிலியம் கூறுவது போல 
வெட்டிப் போட்டுவிட்டாலென்ன 
இதை 
என்று சிலநேரம் தோன்றுகிறது 
வளையில் சுருண்டு
மௌனித்திருக்க வேண்டிய 
இடங்களில் 
நேரங்களில் எல்லாம் 
சட்டென்று 
அசந்தர்ப்பமாய் 
கனத்து விரிந்து சீறுகிறது 
நட்பு நட்பு 
என்று கத்தினாலும் 
கற்பு கற்பு என்று 
கதறினாலும் 
காதில் ஏற்காது 
மயிர்ப் புற்றிலிருந்து 
படமெடுத்து ஆடுகிறது 
இரவுகளில் 
எலும்புவரை 
உயிரை 
இழுத்து உறிஞ்சி 
வெள்ளித் திரவமாய் 
கனவுகளில் பரவுகிறது  

படிக்கும்போது, 
பணி நடுவில், 
பிரார்த்தனையின் பாதியில், 
நோய்ப் படுக்கையில் கூட 
கடுக்கும் விஷமாய் 
கரைக்கும் அமிலமாய்.....
அறிவியல் 
அற நூல்கள் என்று 
அத்தனை போதனைக்கும் 
அடங்காது ஆடும் 
இந்தப் பாம்பை  

வெட்டிப் போட்டுவிட்டால்தான் என்ன?

LinkWithin

Related Posts with Thumbnails