Thursday, July 7, 2011

அவள் இவள்

இவளுக்கு
உம்பெர்டோ ஈகோவைத்தெரியாது
ஆல்பர்ட் காம்யூவையும்
அன்னியமாதலையும் தெரியாது
அந்நியன் படம் மட்டுமே
இவளுக்கு தெரிந்திருக்கிறது ..

காரல் மார்கஸ் தெரியாது
சரி
தெரியாதிருப்பதே நல்லது
கெவின வில்பரையும்
லியோ டால்ஸ்டாயையும் விடடுவிடுங்கள்
புதுமைப் பித்தனையும்
கல்கியையும் கூடத் தெரியாது
சலீல் சவுத்ரி
ஒரு இசை அமைப்பாளர் என்று
தெரிந்தால் அல்லவா
அவர் இசையைக் கேட்பதற்கு...
ஹிட்ச்காக் என்பது
போதையேற்றும் ஒரு பானம்
என்பதாக ஒரு கருத்தில் இருக்கிறாள்
நேற்று இவளுக்கு
சுஜாதாவையும் கூடத்
தெரியாது என்ற போது
சற்று திக்கென்றுதான் இருந்தது.

ஆனாலும் இழவு
இவளை
இப்படி
உடலும் உயிரும்
உருகி உருகி
காதலிப்பதை
நிறுத்தவே முடியவில்லை தோழரே
எனக்கு
எதுவும் பிரச்சினையா?

LinkWithin

Related Posts with Thumbnails